Tơ̆ jơ pơma dơnuh, Kơdră Đuma Teh đak Nga pơma hơdăh ling lang jang hơdai hăm păih Việt Nam, tơlĕch jang dôm tơdrong drơ̆ng nơ̆r kơdră kơpal, hơnhăk tơdrong pơvei Jang hơdai gĭt kăl tôm tong Việt Nam - Nga roi ‘năr roi yak mơ̆t jrŭ, tơpă păng đei yua.

Tơ̆ ‘măng tơƀơ̆p, 2 păh pơma hơdăh khei ‘năr âu ki tơdrong pơvei đơ̆ng 2 Quốc hội hơtŏk tơiung tôch kơ ‘lơ̆ng hơiă; Quốc hội 2 teh đak hlôi jang hơdai kơjăp, jang hơdai đei yua lơ̆m pơđĭ tơdrong 2 pang păng lơ pang, tơlĕch jang đei yua dôm trong jang hơdai tŏk bŏk đei đơ̆ng 2 teh đak, mă loi ‘noh jĭ pơgơ̆r pơlơh dôm ‘Măng hop akŏm kơ Anih jang hơdai 2 Nghị viện.  2 păh lui ngeh akhan Quốc hội 2 păh gô hơnơ̆ng pơm tơdrong hiôk vă tơlĕch jang dôm tơdrong drơ̆ng nơ̆r đơ̆ng Kơdră chĕp kơ̆l kơpal 2 teh đak; lui ngeh dôm anih jang pơjing khôi luơ̆t 2 teh đak lơ̆m jăl jang ‘nao gô hơnơ̆ng yak hơdai kŭm hăm anih jang 2 teh đak tơgop ‘lơ̆ng tơdrong hơtŏk tơdrong pơvei Việt Nam - Nga lơ̆m chăl jang hơdai ‘nao.