Thủ tướng sơkơ̆t hơdah Việt Nam hơnơ̆ng lăng tơgĭt tơdrong jang tơbôl đei hơtŏk đơ̆ng khei năr iung tơblah vă iŏk tơdrong rơngei hiôk hian, ah mă Việt Nam jĭ minh lơ̆m dôm teh đak mă blŭng sơkơ̆t Jơnŭm pơgơ̆r kơdih kơ Algeria ah sơnăm 1958. Thủ tướng Phạm Minh Chính ră hơdah, mă tơpôl lơ̆m apŭng plenh teh tơplih thoi yơ, tơdrong tơguăt kơ 2 teh đak adoi ưh đei kiơ tơplih, kơlih Việt Nam păng Algeria hơnơ̆ng yak hơdoi lơ̆m khei năr tơnap tap hloh.

Hăm tơdrong tơbôl jang hơdoi 'nao đei tơ-iung pơjing, Thủ tướng pơtruh nơ̆r 2 pah dah hrôih pơjing tơdrong jang hơdah; hơtŏk hơpeh hơpong đe kơdră kơpal; pơih să tơdrong jang hơdoi mŭk drăm, tĕch pơdro păng asong jang. Thủ tướng hơpơi 'meh Kơdră teh đak Algeria tơgŭm hăm tơdrong mă Kuôk hô̆i Algeria hrôih kĭ pơkăp dôm tơchơ̆t jang hơdoi păng pơm trong hiôk ăn dôm tơdrong jang sir kôch đak dou kơ anih jang mŭk drăm Việt Nam tơ̆ Algeria.