Kơsơ̆ ‘năr brei (16/12) Thủ tướng teh đak bơ̆n Phạm Minh Chính păng Khul Kơpal kơ teh đak Việt Nam hlôi vih truh Hà Nội, pơtôch ‘lơ̆ng rŏ ‘măng năm pơm jang tơ̆ châu Âu.

Vang năm Hop akŏm kơpal tơbăt 45 xơnăm iung jang tơbôl kơ Jơnŭm dôm teh đak tơring Đông Nam Á (ASEAN) – Jơnŭm châu Âu (EU) păng năm tơmang teh đak Luxembourg, Hà Lan, păng teh đak Bỉ. ‘Măng năm tơmang đơ̆ng Thủ tướng Phạm Minh Chính jing gru kơnăl kăp gĭt lơ̆m tơbôl đơ̆ng Việt Nam hăm Luxembourg, Bỉ, păng Hà Lan, tơgŭm hơtŏk đon lui găh chĭn trĭ, hơtŏk pran tôm tơdrong jang tơbôl đơ̆ng Việt Nam hăm 3 teh đak lơ̆m khei năr hơtŏk tơ-iung ‘nao roi năr roi kơhret, tơnăp, pơm jang kơyươ tơdrong pơyua găh xơđơ̆ng tơpôl – hơtŏk tơ-iung kơ Việt Nam păng tơgop ăn tơdrong rơngei xơđơ̆ng, jang hadoi păng hơtŏk tơ-iung tơ̆ tơring păng lơ̆m kơpal teh. Hop akŏm Kơpal tơbăt 45 xơnăm jang tơbôl ASEAN-EU noh kăp gĭt hloh, jing trong hiôk vă rim kơdră kơpal 2 păh tơlĕch dôm trong pơkăp jang kăl vă hơtŏk tơ-iung pran hloh dơ̆ng lơ̆m tơbôl ASEAN-EU khei năr truh.