VOV4.Bahnar - Kơ sơ̆ ‘năr 23/1, tơ̆ dêh char Vĩnh Long, Thủ tướng teh đak Phạm Minh Chính păng Kơ dră chĕp kơ̆l Ban Bí thư Võ Văn Thưởng hlôi năm soh nhang, dan pơ kao tơ̆ hơ nih ƀlŏk hơ dơ̆r Kơ dră Jơ nŭm Kơ dră tơm Phạm Hùng păng hơ nih ƀlŏk hơ dơ̆r kơ Thủ tướng teh đak Võ Văn Kiệt. Thủ tướng kŭm hăm khŭl bơ̆ jang hlôi dan pơ kao, soh nhang, kŭp kơ̆l vă băt bơ nê kŏng jang đơ̆ng Kơ dră Jơ nŭm Kơ dră tơm Phạm Hùng păng Thủ tướng teh đak Võ Văn Kiệt - 2 ‘nu kon hơ gei kơ pơ lei pơ la Vĩnh Long hlôi đei plang lơ jơ hngơ̆m jang ăn tơ drong jang tơ blăh iŏk rơ ngei hơ drĕch hơ drŭng, pơ jing teh đak. ‘Măng âu, Thủ tướng kŭm hăm khŭl bơ̆ jang hlôi năm tơ mang păng hmach têt kŏng nhân kơ anih jang kơ măy kơ mŏk Hòa Phú, apŭng Long Hồ, dêh char Vĩnh Long; hmach têt, asong tơ mam ăn dôm ŭnh hnam teh đak tơ gŭm, ŭnh hnam dơ nuh hin, dôm ŭnh hnam đei ƀơm kơ nê̆ yua đơ̆ng COVID-19 păng pơ jao 100 tŏ hnam asong ăn dôm ŭnh hnam mơ mat tat kơ apŭng Vũng Liêm păng apŭng Tam Bình.

Thuem: Tơ blơ̆