VOV4.Bahnar - Kơ sơ̆ 31/3, tơ̆ Anih jang kơ Khul kơ dră tĕh đak, Thủ tướng Phạm Minh Chính sơng Bơ ngai tang măt ăn Thái Lan tơ̆ Việt Nam Nikorndej Balankura truh tơ ƀâp. Tơ̆ jơ sơng, Thủ tướng Phạm Minh Chính tơ chĕng ‘lơ̆ng tơ drong pơ vei, jang hơ doi gĭt kăl Việt Nam - Thái Lan khei ‘năr âu ki tŏk tôch ‘lơ̆ng, lơ̆m rim tơ drong jang.

Thủ tướng tĕh đak pơ ma hơ dăh, 2 tĕh đak hơ athei hơ tŏk hlŏh dơ̆ng tơ drong jang hơ doi, lui băl, lơ̆m nŏh pơ gơ̆r ‘lơ̆ng tơ drong pơ ma nuh, tơ ƀâp băl đơ̆ng kuan tih păng dôm anih jang kơ pal ăn dôm trong jang hơ doi 2 pang, mă loi trong jang hơ doi đơ̆ng 2 Khul kơ dră tĕh đak păng Anih jang hơ doi 2 pang.

Thủ tướng athei 2 păh hơ tŏk tơ drong pơ ma nuh găh chih tơ băt hla ar Hô̆ chiê̆u vắc-xin đơ̆ng băl; pơih dơ̆ng dôm trong păr vih vât tơ̆ băl, pơ jing tơ drong ‘lơ̆ng ăn tơ drong chă tơ mang lăng, tĕch mơ dro đơ̆ng 2 tĕh đak; pơ ma hơ dăh Việt Nam vă hơ nơ̆ng jang hơ doi kơ jăp hăm Thái Lan vă pơm ‘lơ̆ng ăn tơ drong jơ nei kơ sơ năm APEC Thái Lan 2022.

Dơ̆ng: Tơ blơ̆