Kơ sơ̆ 6/11, tơ̆ Anih jang kơ Khul kơ dră tĕh đak, Thủ tướng Phạm Minh Chính sơng ƀok Karl Van Den Bossche, Bơ ngai tang măt tôm tơ drong kơ tĕh đak Bỉ tơ̆ Việt Nam ƀlep ƀât Bơ ngai tang măt truh iŏk jang tơ drong jang tơ̆ tĕh đak bơ̆n. Tơ̆ jơ sơng, Thủ tướng Phạm Minh Chính pơ ma hơ dăh Việt Nam ling lang năng kăl tơ drong pơ vei hăm Bỉ, tơ ƀôh đon hơ pơi ‘mĕh lơ̆m jăl jang kơ dih, Bơ ngai tang măt hơ nơ̆ng tơ gop ‘lơ̆ng ăn tơ drong hơ tŏk tơ drong pơ vei păng jang hơ doi đơ̆ng Việt Nam păng Bỉ.

Thủ tướng athei 2 tĕh đak hơ nơ̆ng jang hơ doi, tơ gŭm băl lơ̆m rim hop akŏm lơ pang păng anih jang lơ̆m apŭng plenh tĕh, mă loi jĭ tơ̆ Liên hợp quốc, ASEM, Grŭp pơ ma nơ̆r Phalăng, ASEAN-EU… jang hơ doi, pơ gơ̆r đang ‘lơ̆ng Hop akŏm tih ASEAN-EU ƀât tŏk bŏk khei 12 truh tơ̆ Bỉ. Găh tơ drong tơ̆ đak dơ sĭ Biển Đông, 2 păh drơ̆ng nơ̆r hăm tơ drong gĭt kăl đơ̆ng vei kơ jăp tơ drong rơ ngei, sơ đơ̆ng, ‘lơ̆ng păng hiôk hian tơ̆ trong đak dơ sĭ păng trong gre păr, sek tơ lang rơ ngei dôm tơ drong tơ gar băl kiơ̆ luơ̆t apŭng plenh tĕh, lơ̆m nŏh đei tơ drong hơ găt đơ̆ng Liên hợp quốc găh Luơ̆t đak dơ sĭ sơ năm 1982.