Kơsơ̆ 26/2, tơ̆ Anih jang kơ Khul kơdră  teh đak, Thủ tướng Phạm Minh Chính sơng Bơngai tang măt ăn teh đak Bỉ tơ̆ Việt Nam Karl Van Den Bossche pơma nuh găh tơdrong jang hơdoi Việt Nam - Bỉ, mă loi găh tơdrong jang mŭk drăm, tĕch mơdro, tơmât jên jang păng tơgŭm sek tơlang pơ’lơ̆ng dôm tơdrong răm đơ̆ng pơgang dioxin tơ̆ Việt Nam. Pơma hơdăh Việt Nam ling lang năng Bỉ jĭ teh đak jang hơdoi gĭt kăl lơ̆m EU, Thủ tướng athei 2 păh hơnơ̆ng hơmet kơjăp đon lui chinh trĭ kiơ̆ đơ̆ng hơtŏk tơdrong pơgơ̆r ăn khul jang pơma nuh; hơtŏk tơdrong đei yoa đơ̆ng dôm trong jang hơdai 2 pang, vang jang hơdoi kơjăp tơ̆ rim khul grŭp, anih jang lơ̆m apŭng plenh teh.

Atŭm hăm ‘nŏh 2 păh hơnơng vei kơjăp păng tưk tơiung tơdrong jang hơdoi găh dôm tơdrong jang so nhen khul linh, vei sơđơ̆ng teh đak, jŏh ayŏ kơ dŏ xoang, pơtho pơhrăm, tang găn tŏ ‘mi kial tơplih, chă tơmang lăng... păng pơih xă tơdrong jang hơdoi găh dôm tơdrong gĭt kăl ƀơm truh khoa hŏk, kơmăy kơmŏk, chip bán dẫn, trong gre chơ chuĕn... Ƀlep ƀât ‘măng mă âu, Thủ tướng pơma dơ̆ng nơ̆r bơnê hăm Hạ viện Bỉ hlôi drơ̆ng nơ̆r ăn tơdrong tơchơ̆t Tơgŭm ăn bơngai răm đơ̆ng pơgang dioxin Việt Nam (khei 10/2023), vang tơgop pơm hơtŏk tơdrong tơgŭm đơ̆ng tơpôl lơ̆m apŭng plenh teh găh tơdrong ‘nâu.