VOV4.Bahnar - Kơ sơ̆ ‘năr 8/3 Thủ tướng Phạm Minh Chính hlôi sơng khŭl jang mơ dro sa Jơ nŭm tĕch mơ dro Mi -ASEAN (USABC). Tơ̆ jơ sơng, Thủ tướng roi tơ băt Việt Nam ling lang lăng kăl păng ‘meh vă hơ nơ̆ng pơm ‘lơ̆ng hloh dơ̆ng, hơ tŏk tơ iung tơ drong pơ vei jang tơ bôl tôm tông Việt Nam – Mi tŏk ‘lơ̆ng ‘nao păng đei yua hloh, lơ̆m noh, jang hơ dai mŭk drăm - mơ dro sa - tơ mơ̆t jên jang ‘noh tơm, tưk tơ iung pran kơ tang lơ̆m tơ drong pơ vei 2 teh đak. Rim anih jang mơ dro sa lăng ‘lơ̆ng dôm trong jang tơ gŭm anih jang mơ dro sa lơ̆m khei ‘năr mơ mat tat yua đơ̆ng COVID-19; tơ ƀôh đon hơ iă tơ̆ hơ năp dôm jơ nei tang găn jĭ hăm kơ sô̆ ƀet bơ̆ng lơ hloh lơ̆m apŭng plĕnh teh păng tơ drong pơm lăp sơ đơ̆ng, tơ tĕnh, vei lăng đei yua jĭ hơ buh đơ̆ng Việt Nam. Dôm khŭl jang mơ dro sa tơ roi 1,2 nơ̆r apĭnh, pơ ma dơ nuh ‘meh vă hơ tŏk loi dơ̆ng jang hơ dai, tĕch mơ dro tơ̆ Việt Nam, mă loi ‘noh lơ̆m rim tơ drong jang: Tơ plĭh ŭnh hơ yuh, tơ jur tơ lĕch ‘mê̆ ‘mach carbon; tơ plih kơ sô̆, tơ gop hơ nhăk mŭk drăm Việt Nam tŏk đơ̆ng 21 ti USD sơ năm 2021 tŏk 57 ti USD lơ̆m sơ năm 2025.

Thuem: Tơ blơ̆