VOV4.Bahnar - Kơ sŏ 31/5, tơ̆ Anih jang kơ Khul kơ dră tĕh đak, Thủ tướng Phạm Minh Chính sơng ƀok Pascal Soriot, Kơ dră chĕp kơ̆l Grŭp jang AstraZeneca ƀlep ƀât ƀok năm hơ pong, bơ̆ jang tơ̆ Việt Nam kiơ̆ nơ̆r krao đơ̆ng Thủ tướng tĕh đak.

Tơ̆ jơ sơng, Thủ tướng Phạm Minh Chính tơ chĕng ‘lơ̆ng tơ drong jang, tơ drong tơ gop đơ̆ng Grŭp jang AstraZeneca lơ̆m tơ drong adrin tang găn jĭ COVID-19 lơ̆m apŭng plenh tĕh păng tơ̆ Việt Nam. Thủ tướng bơ nê tơ drong jang hơ doi tôch kơ jăp păng đei yoa đơ̆ng AstraZeneca păng Việt Nam khei ‘năr âu ki, mă loi jĭ kơ dih kâu ƀok Pascal Soriot đei nơ̆r athei AstraZeneca pơ truh hrôih vă jê̆ 30 triu kơ liêu vắc-xin tang găn jĭ COVID-19 ăn Việt Nam lơ̆m sơ năm 2021.

Hôn bơ nê tơ drong tơ chơ̆t pơih xă trong tơ mât jên jang ăn tơ drong jang hơ doi pơm tơ lĕch pơ gang đei kơ jă 90 triu USD tơ̆ Việt Nam, Thủ tướng tơ ƀôh đon hơ iă găh tơ drong Anih tơm vei lăng jang pơ gang păng Công ty AstraZeneca Việt Nam oei adrin pơ ma nuh vă kĭ pơ kăp hla ar jang hơ doi đơ̆ng 2 pang. ‘Nâu jĭ tơ drong kăl vă AstraZeneca jang hơ doi kơ jăp đunh tơ̆ Việt Nam, tơ ƀôh hơ dăh nơ̆r pơ kăp vang yak hơ doi hăm Việt Nam lơ̆m tơ drong jang tŏk pran kơ jăp.

Dơ̆ng: Tơ blơ̆