VOV4.Bahnar - Kơ sơ̆ ‘năr 6/9, Thủ tướng Phạm Minh Chính sơng ƀok Khuong Sreng, Kơ dră chĕp kơ̆l Đảng bộ Đảng Kon pơ lei Campuchia Anih tơm Pnom Penh (Campuchia) tŏk bŏk tơ mang, bơ̆ jang tơ̆ Anih tơm Hà Nội păng pơ lei tơm Hồ Chí Minh.Tơ̆ jơ sơng, Thủ tướng Phạm Minh Chính hơ len lăng khei ‘năr âu ki, jang hơ dai đơ̆ng 2 teh đak đei hơ tŏk tơ iung sơ đơ̆ng; kơ dră chĕp kơ̆l 2 teh đak pơ vei tơ ƀơ̆p pơ ma dơ nuh hơ nơ̆ng, mă loi ‘noh jĭ ‘măng tơ ƀơ̆p kơ dră kơ pal đơ̆ng Tổng Bí thư Nguyễn Phú Trọng, Kơ dră Đảng Kon pơ lei Campuchia, Thủ tướng teh đak Campuchia Hun Sen păng Tổng Bí thư, Kơ dră chĕp kơ̆l teh đak Lào Thongloun Sisoulith; dôm trong jang hơ dai 2 pang hơ nơ̆ng hơ tŏk iŏk yua.

Thủ tướng athei 2 păh hơ nơ̆ng vang jang hơ dai băl pơ trŭt tơ drong pơ vei 2 teh đak lơ̆m dôm tơ drong jang; vei lăng păng pơ jing trong sơ lam rơ ngei, tơ bôl, jang hơ dai păng hơ tŏk tơ iung, pơ trŭt mŭk drăm ‘măng jang sơ lam; pơm tơ drong hiôk ăn dôm anih jang mơ dro sa 2 teh đak tơ mơ̆t jên jang, bơ̆ jang, jang hơ dai pơm tơ lĕch tĕch mơ dro; hơ tŏk loi dơ̆ng jang hơ dai pơ tho pơ hrăm, pơ gơ̆r joh ayŏ, tơ mang lăng.

Thuem: Tơ blơ̆