VOV4.Bahnar - Kơ sơ̆ ‘năr 5/8, Thủ tướng Phạm Minh Chính sơng ƀok Roh Tae-Moon, Kơ dră dơ nơm vei lăng Grŭp jang Samsung điện tử (Hàn Quốc) tŏk bŏk tơ mang, bơ̆ jang tơ̆ Việt Nam. Tơ̆ jơ sơng, Thủ tướng pơ ma hơ dăh Khŭl kơ dră teh đak Việt Nam pơ kăp pơm rim tơ drong hiôk, hơ met ‘lơ̆ng hơ nih tơ mơ̆t jên jang ăn rim bơ ngai tơ mơ̆t jên jang teh đak đe pơ ma atŭm păng Samsung pơ ma hơ drô̆, set hơ len tơ păt păng hơ drin hơ met pơ ‘lơ̆ng dôm nơ̆r athei đơ̆ng Samsung, lơ̆m noh đei tơ drong pơ tho, hơ tŏk ‘lơ̆ng bơ ngai jang pơm lăp hăm ‘meh vă đơ̆ng rim anih jang mơ dro sa, bơ ngai tơ mơ̆t jên jang. Thủ tướng ‘meh vă Samsung hơ nơ̆ng tơ gop nơ̆r găh trong jang tơ gŭm păng pơ̆ih să dôm tơ drong jang tơ mơ̆t jên jang, tĕch mơ dro, lăng Việt Nam jĭ anih gơ nang gĭt kăl, tơ drong jang jơ̆p plĕnh teh tôm tong hloh găh pơm tơ lĕch, tơ chĕng hơ len - hơ tŏk tơ iung dôm tơ mam tơm lĕch tơ̆ anih tĕch mơ dro apŭng plĕnh teh, tơ gop hơ nhăk tơ drong pơ vei đơ̆ng 2 teh đak tŏk kơ jung ‘nao, roi ‘năr roi yak mơ̆t jrŭ, tơ pă, đei yua.

Thuem: Tơ blơ̆