VOV4.Bahnar - Kơ sơ̆ ‘năr 2/6, tơ̆ Anih bơ̆ jang kơ Khŭl kơ dră teh đak, Thủ tướng Phạm Minh Chính hlôi sơng Trung tướng Khamlieng Outhakaysone, Phŏ Kơ dră Anih tơm vei lăng khŭl linh, Kơ dră jang tơ gŭm Khŭl linh kon pơ lei Lào păng Khŭl tang măt khŭl linh gĭt kăl Khŭl linh kon pơ lei Lào tŏk bŏk đei ‘măng năm tơ mang tơ̆ Việt Nam. Tơ̆ jơ sơng, Thủ tướng pơ ma hơ dăh Đảng, teh đak, Khŭl kơ dră teh đak păng kon pơ lei Việt Nam tôch kơ lăng kăl pơ trŭt tơ drong pơ vei jang hơ dai hăm Lào; hơ nơ̆ng hơ tŏk loi dơ̆ng păng hơ met ming kơ jăp tơ drong pơ vei tơ bôl joăt joe păng tơ drong jang hơ dai tôm tơ drong Việt Nam-Lào hlôi đei rim jơ hnơr kơ dră chĕp kơ̆l vei kơ jăp.

Tơ drong jang tơ gŭm đơ̆ng Việt Nam ‘noh jĭ hơ nơ̆ng đĭ jơ hngơ̆m vă vang hơ dai hăm Lào pơ trŭt tơ drong pơ vei jang hơ dai kơ jăp đơ̆ng 2 teh đak roi ‘năr roi ‘lơ̆ng hơ iă păng đei yua lơ̆m đĭ đăng rim tơ drong jang. Lơ̆m noh, tơ drong pơ vei khŭl linh Việt Nam-Lào ling lang jing 1 lơ̆m dôm tơ drong tơm gĭt kăl kơ tơ drong pơ vei đơ̆ng 2 teh đak, yua kơ tơ drong rơ ngei, sơ đơ̆ng păng hơ tŏk tơ iung kơ 2 teh đak păng tơ gôp pơ vei tơ drong rơ ngei tơ̆ tơ ring păng lơ̆m apŭng plĕnh teh.

Thuem: Tơ blơ̆