VOV4.Bahnar - Tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính sơng Kơ dră tang măt Mông Cổ năm kơ kuh pơ ma dơ nuh ƀlep ƀơ̆t iŏk tơ drong bơ̆ jang tơ̆ Việt Nam. Tơ̆ jơ sơng, Thủ tướng teh đak Phạm Minh Chính pơ ma hơ dăh, 2 teh đak đei tơ drong pơ vei jang hơ dai tơ bôl joăt joe, tơ gŭm băl lơ̆m kơ plăh pơ jing păng hơ tŏk tơ iung teh đak, lơ̆m khei ‘năr jĭ hơ buh COVID-19 ƀơm ưh kơ ‘lơ̆ng truh tơ drong apŭng plĕnh teh păng tơ ring mă lei tơ drong pơ vei 2 teh đak hơ nơ̆ng đei pơ vei tŏk ‘lơ̆ng.

Thủ tướng athei 2 păh hơ nơ̆ng tơ gŭm băl lơ̆m dôm hop akŏm lơ pang păng Mông Cổ hơ nơ̆ng tơ gŭm tơ drong jang đơ̆ng  ASEAN păng Việt Nam lơ̆m tơ drong hơ met pơ ‘lơ̆ng rơ ngei dôm tơ drong tơ gar băl, vei sơ đơ̆ng gre păr, duk tơ̆ đak dơ sĭ. Kơ dră tang măt Mông Cổ drơ̆ng nơ̆r ‘lơ̆ng hăm dôm nơ̆r athei jang hơ dai đơ̆ng Thủ tướng Phạm Minh Chính, pơ ma hơ dăh gô hơ drin jang hơ dai kơ jăp hăm rim anih jang Việt Nam pơ trŭt hloh dơ̆ng tơ drong pơ vei tơ bôl păng jang hơ dai joăt joe đơ̆ng 2 teh đak, pơ trŭt jang hơ dai mŭk drăm, mơ dro sa, tơ mơ̆t jên jang gre kơ dâu păng tơ ƀơ̆p pơ ma dơ nuh đơ̆ng kon pơ lei.

Thuem: Tơ blơ̆