VOV4.Bahnar - Kơ sơ̆ ‘năr 13/4, tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính hlôi sơng Kơ dră tơm jang tơ bôl Canada ƀlep ƀơ̆t ‘măng năm tơ mang tơ̆ Việt Nam. Tơ̆ jơ sơng, Thủ tướng Phạm Minh Chính tơ ƀôh đon chơt hơ iă ƀơ̆t tơ drong pơ vei 2 teh đak hơ nơ̆ng hơ tŏk tơ iung jơ nei păng ‘lơ̆ng. Kơ dră tơm jang tơ bôl Canada drơ̆ng nơ̆r hăm dôm nơ̆r athei đơ̆ng Thủ tướng Phạm Minh Chính găh dôm trong jang pơ trŭt tơ drong pơ vei 2 teh đak tơ̆ hơ năp kơnh, mă loi ‘noh năr 2 teh đak tơ băt 50 sơ năm pơ vei jang tơ bôl lơ̆m sơ năm 2023.

Kơ dră tơm jang tơ bôl Canada tơ băt ‘măng năm tơ mang oei lơ̆m tơ drong jang Ấn Độ Dương - Thái Bình Dương ‘nao đơ̆ng Canada, kiơ̆ kơ ‘noh Canada ‘meh vă pơ trŭt hloh dơ̆ng tơ drong pơ vei hăm 1,2 teh đak tơ̆ tơ ring, lơ̆m noh Việt Nam jĭ kăl hơ drol hloh. 2 păh kŭm pơ ma dơ nuh găh tơ drong Biển Đông, pơ ma hơ dăh tơ drong gĭt kăl đơ̆ng sek tơ lang pơ ‘lơ̆ng tơ drong tơ gar băl hăm trong jang rơ ngei kiơ̆ lơ̆m luơ̆t apŭng plĕnh teh păng tơ drong tơ chơ̆t đơ̆ng Liên hợp quốc găh Luơ̆t đak dơ sĭ 1982 (UNCLOS); jang kiơ̆ tôm DOC, yak truh pơ jing COC tơ pă, đei yua, ‘lơ̆ng; vei sơ đơ̆ng hiôk hian, sơ đơ̆ng duk kơ dâu, gre păr tơ̆ Biển Đông, kiơ̆ lơ̆m đei yua đơ̆ng đĭ đăng rim teh đak.

Thuem: Tơ blơ̆