VOV4.Bahnar - Kơ sơ̆ 06/7, tơ̆ Anih jang kơ Khul kơ dră tĕh đak, Thủ tướng Phạm Minh Chính đei jơ sơng Kơ dră tơm jang tơ bôl tĕh đak Nga Sergey Lavrov. Tơ̆ jơ sơng, Thủ tướng Phạm Minh Chính tơ chĕng ‘lơ̆ng tơ drong jang hơ doi đơ̆ng 2 păh hlôi iŏk đei lơ̆m khei ‘năr âu ki. 

Thủ tướng Phạm Minh Chính pơ ma hơ dăh, Khul kơ dră tĕh đak Việt Nam ling lang năng kăl tơ drong pơ vei jang hơ doi gĭt kăl tôm tơ drong hăm Nga, hơ pơi ‘mĕh pơm pơ ‘lơ̆ng păng đei yoa hlŏh dơ̆ng tơ drong jang hơ doi 2 pang găh rim tơ drong kiơ̆ jơ hngâm đon đei yoa, tơ păt ‘lơ̆ng, lui băl. 2 păh drơ̆ng nơ̆r hơ tŏk trong jang kiơ̆ dôm tơ drong drơ̆ng nơ̆r iŏk đei lơ̆m ‘măng năm hơ pong tơ̆ băl đơ̆ng kơ dră chĕp kơ̆l 2 tĕh đak; vei kơ jăp trong jang hơ doi lơ̆m rim tơ drong đơ̆ng sơ̆ mă 2 păh jang pran, gơ̆h hơ gei.

Dơ̆ng: Tơ blơ̆