Tơ̆ jơ sơng, Thủ tướng pơma hơdăh, tơdrong pơvei ‘lơ̆ng hơiă đơ̆ng Việt Nam păng Nga, đơ̆ng Đảng cộng sản Việt Nam păng Đảng cộng sản Liên Bang Nga roi đunh roi kơjăp ‘lơ̆ng. Thủ tướng Phạm Minh Chính akhan, lơ̆m chăl ‘nao 2 teh đak athei jang hơdoi, pơjing jơhngâm pran, pơma nuh pơm hơtŏk đon lui păng hlôh vao băl; chă mơ̆ng lăng nơ̆r pơma đơ̆ng băl, tơgŭm băl tôch pơneh păng bơ̆ jang hăm dôm tơdrong đei tơpă.

Pơma hơdăh tơ̆ hơnăp ning mônh, Việt Nam tơlĕch đon pơhnŏng jang tŏk truh 2 kơsô̆, Thủ tướng akhan, Việt Nam chih hơdăh jơhngâm pran tơ̆ lăm ‘nŏh jĭ kon bơngai, cham char bri brăh, jŏh ayŏ kơ dŏ xoang ‘nŏh tôch gĭt kăl, jĭ tơmam kăl vă gơ̆h jang đei tơ̆ yăn âu; mŭk drăm, jên hu đơ̆ng ‘ngoăih ‘nŏh jĭ kơmăy kơmŏk, unh hơyuh, trong vei lăng ‘nŏh jĭ tơdrong kăl jang hơnơ̆ng, vă gơ̆h jang tŏk pran. Hăm tơmam, jên hu đơ̆ng ‘ngoăih, Thủ tướng pơma hơdăh Việt Nam ưh gơ̆h thiê̆u tơdrong tơgŭm đơ̆ng teh đak Nga, mă loi găh unh hơyuh, đak dâu, dôm tơdrong đei ƀơm truh vei sơđơ̆ng teh đak, jŏh ayŏ kơ dŏ xoang.