Tơ̆ jơ sơng, Thủ tướng Phạm Minh Chính pơma hơdăh tơdrong pơvei gĭt kăl Việt Nam - Campuchia ‘noh ưh kơ gơh pleh tơklăh, lơ̆m noh đei dôm tơdrong tơgŭm, plang jơhngơ̆m ưh kơ kĕ jô̆. Hơnăp jang đơ̆ng 2 teh đak ‘noh jĭ hơnơ̆ng hơtŏk tơdrong joăt joe ‘lơ̆ng hơiă âu vă vang hơdai băl yak tŏk, tơgŭm băl vang pơ jing mŭk drăm hiôk hian, pơm tơm kơ dih, kiơ̆ lơ̆m tơdrong đon tơpăt, lui ngeh, đei yua.

Mă loi ‘noh jĭ athei pơtrŭt jang hơdai pơtho bơngai jang; pơtho pơhrăm joăt joe 1 ƀơ̆r đon, jơhnơr arih, joh ayŏ đơ̆ng 2 teh đak ăn dôm jơhnơr mơ lôh. Thủ tướng athei kiơ̆ lơ̆m kơchư̆k jang ‘nao, ƀok kơdră tang măt hơnơ̆ng tơgop ‘lơ̆ng lơ̆m tơdrong vei răk răk, hơtŏk tơdrong joăt joe 1 ƀơ̆r đon, jang tơbôl, jang hơdai păng tơgŭm băl đơ̆ng 2 teh đak.