Kơsơ̆ 11/11, tơ̆ Anih bơ̆jang kơ Khŭl kơdră teh đak, Thủ tướng Phạm Minh Chính sơng Kơdră Anih tơm vei lăng Bơngai jang păng Tơdrong pơyua ăn tơpôl kơ teh đak Cộng hòa Dân chủ Nhân dân Lào Phosay Sayasone (Phô-xay Xay-a-xon). Thủ tướng tơƀôh đon chơt hơiă tơ̆ hơnăp tơdrong pơvei jang hơdai gĭt kăl Việt Nam – Lào hơnơ̆ng hơtŏk tơiung gĭt kăl, kơjăp lơ̆m khei ‘năr tơring păng apŭng plĕnh teh đei lơ tơplih.

Thủ tướng pơma hơdăh Việt Nam gô ling lang hơdai, tơgŭm tôch ai lơ̆m tơdrong kĕ jang vă hơdai hăm Lào pơtrŭt sơđơ̆ng păng hơtŏk tơiung kơjăp. Tơ̆ jơ sơng, Thủ tướng athei 2 Anih tơm hơtŏk loi dơ̆ng jang hơdai kơjăp, akŏm tơchĕng hơlen, pơjing trong vă jang hơdai ‘nao lơ̆m tơdrong jang bơngai jang păng bơngai đei kŏng, lăp hăm khei ‘năr hrei ‘nâu. Kiơ̆ đơ̆ng noh, 2 păh gô kĭ pơkăp drơ̆ng nơ̆r jang hơdai, tŭn pran tơroi băl tơdrong kơtơ̆ng ang, hlôh vao vei lăng păng pơma dơnuh trong jang tơgŭm.