Tơ̆ jơ sơng, pơma nuh găh dôm tơdrong nol, mơmat tat đei tơlĕch lơ̆m sơnăm 2023 găh tơdrong jang mŭk drăm lơ̆m plei tĕh nhen roi jur, tơdrong krê tơmam tĕch mơdro tơ̆ tĕh đak đe jur lơ, tơdrong kơhret đơ̆ng kơjă tơmam tŏk… đei yă Antoinette Sayeh pơma tơ lĕch.

Thủ tướng Phạm Minh Chính ăn tơbăt, Khul kơdră tĕh đak Việt Nam vă adrin tơlĕch jang hrơ̆ch ‘lơ̆ng rim trong jang vă vei lăng sơđơ̆ng ‘lơ̆ng mŭk drăm jơ̆p lơ̆m tĕh đak, tang găn kơjă tơmam tŏk, hơtŏk tơdrong jang tŏk, vei lăng ‘lơ̆ng rim tơdrong tih lơ̆m tơdrong jang mŭk drăm.

Thủ tướng pơma hơdăh: Roi đei tơdrong nol, roi pŭ tơdrong kơhret ‘nŏh athei roi adrin vă yak hlŏh dơ̆ng. Roi mơmat tat, hơnat hơnot ‘nŏh athei roi mât 1 ƀơ̆r đon, drơ̆ng pôm nơ̆r dơ̆ng. Việt Nam ling lang ‘mĕh pơma nuh, chă mơ̆ng nơ̆r tơtă, roi tơƀôh đơ̆ng dôm anih jang lơ̆m apŭng plenh tĕh nhen IMF, Anih mong jên apŭng plenh tĕh (WB).