Tơ̆ tơƀơ̆p, Thủ tướng chơt hơ iă ƀôh hơdăh tơdrong tơgoăt tơgoăl Jang hơdoi gĭt kăl tôm tong Việt Nam - Nhật Bản atŏk tơ iung kơtang, jơnei, tơpă lơ̆m rim tơdrong, hăm tơdrong lui yom chinh trĭ kơtang. Nhật Bản hơnơ̆ng jĭ teh đak jang hơdoi mŭk drăm tơm hloh kơ Việt Nam, teh đak pơtruh ăn tơgŭm djru ODA păng jang hơdoi ăn bơngai năm jang dơ̆ng hơlou, teh đak tơmơt jên jang dơ̆ng mă pêng, jang hơdoi mơdro sa păng tơmang pơhiơ̆ dơ̆ng mă 4 kơ Việt Nam. Khei năr truh ou kơnh, vă tơgop ba tơgoăt tơgoăl Jang hơdoi gĭt kăl tôm tong Việt Nam - Nhật Bản roi năr roi kơtang, tơpă, tôm tong, Thủ tướng Phạm Minh Chính athei dêh char Yamaguchi pơtrut kơtang jang hơdoi hăm Bình Dương păng rim dêh char anai kơ Việt Nam găh mŭk drăm, mơdro sa, tơmơ̆t jên jang, pơtrŭt rim hơnih mơdro sa kơ dêh char pơih să tơmơ̆t jên jang; atŏk kơtang răt iŏk tơmam drăm, mă kăl tơmam drăm gĭt kăl kơ Việt Nam.