Ƀar păh hôn bơnê kơtang dôm tơdrong iŏk đei jơnei hơ iă đơ̆ng rŏng 10 sơnăm kĭ pơkăp păng tơlĕch jang kiơ̆ Tơdrong tơchơ̆t Mơdro sa Hiôk hian ƀar păh Việt Nam hăm EAEU, tơgop pơm hơtŏk kơtang tŏk mơdro sa, pơih să hơnih mơdro sa păng pơjing hơyak ‘lơ̆ng ăn jang hơdoi tơmơ̆t jên jang. Thủ tướng pơma hơdăh kăl hơnơ̆ng tơlĕch jang kiơ̆ jơnei tơdrong tơchơ̆t, pơtrŭt kơtang tơgoăt tơgoăl Việt Nam - EAEU hăm rim tơdrong jang, tơdrong vă jang hơdoi hơdăh; plôih ‘măng mơdro sa kơtang hloh dơ̆ng, jang kiơ̆ kơjăp dôm tơdrong đei kơ ƀar păh. Thủ tướng athei rim teh đak lơ̆m khul EAEU hơnơ̆ng tơlĕch jơnei rim trong jang hơdoi, tơtom hơmet pơ ‘lơ̆ng tơhlăk tơhlĭn kih thuơ̆t; pơih să răt tơmơ̆t tơmam drăm choh jang sa, ka hơdang, điên tư păng tơmam drăm kăl kơ Việt Nam. Ƀar păh drơ̆ng mĭnh nơ̆r pơtrŭt kơtang jang hơdoi kiơ̆ trong tơgoăt tơgoăl, plang ăn dih băl dôm tơdrong đei iŏk yoa hơ iă, vang tơgŭm dih băl dôm tơdrong hiong răm ou to, lăng truh atŏk tơ iung kơjăp, sơđơ̆ng păng đunh đai.