VOV4.Bahnar - Kơsơ̆ năr 15/6, Thủ tướng Tĕh đak Phạm Minh Chính sơng pơma dơnŭh hăm Kơdră tang măt tĕh đak Ai Cập tơ̆ Việt Nam trŭh kŭh ka hla bat. Tơ̆ jơ tơ ƀơ̆p, Thủ tướng sơkơ̆t hơdăh Việt Nam hơnơ̆ng lăng kơ jăp joăt joe tơgoăt tơgoăl, jang hơdoi ƀar tĕh đak Việt Nam- Ai Cập.

Thủ tướng athei ƀar păh kăl iung jang hơdoi kơ jăp hlŏh dơ̆ng vă hơnhăk tơgoăt tơgoăl jang hơdoi lơ tơdrong ƀar tĕh đak kơtang hlŏh dơ̆ng, tơpă hlŏh dơ̆ng păng đei iŏk yua kơ jăp ‘moi kiơ̆ rim trong jang nhen: atŏk kơtang tơ ƀơ̆p, pơma dơnŭh dĭh băl khŭl bơ̆ jang lơ̆m rim tơdrong jang chĭnh trĭ, mŭk drăm. Thủ tướng athei ƀar păh atŏk kơtang jang hơdoi lơ̆m rim tơdrong lơ̆m plei tĕh păng rim ‘măng hop akom lơ pang; tơgŭm djru trong jang kơ ASEAN păng Việt Nam găh tơdrong Biển Đông; pơtrŭt kơtang jang hơdoi vei lăng sơđơ̆ng-vei lăng tĕh đak păng jang hơdoi lơ̆m khŭl lĭnh vei lăng rơngei hiôk hian kơ Liên Hợp Quốc, ‘moi kiơ̆ yom dĭh băl tơdrong pơm tơm kơ dĭh păng đei iŏk yua trŏ ƀlep kơ rim tĕh đak, tơgop lơ̆m rơngei hiôk hian, sơđơ̆ng, jang hơdoi păng atŏk tơ iung lơ̆m tơring păng apŭng plĕnh tĕh.

Tơblơ̆ nơ̆r: Amazưt