VOV4.Bahnar - Pơ gê 13/10, tơ̆ plt Cần Thơ, Thủ tướng Phạm Minh Chính păng dôm bơ ngai tang măt Kuô̆k hô̆i găh Khul tang măt Kuô̆k hô̆i plt Cần Thơ tơ ƀâp bơ ngai tăh hla adrol kơ hop akŏm mă 4, Kuô̆k hô̆i jăl XV. Tơ̆ jơ tơ ƀâp, bơ ngai tăh hla plt Cần Thơ tơ ƀôh đon hơ iă tơ̆ hơ năp tơ drong jang mŭk drăm tơ pôl kơ tĕh đak 9 khei âu ki iŏk đei lơ tơ drong jơ nei ‘lơ̆ng hơ iă găh rim tơ drong; hơ pơi ‘mĕh păng pơ truh nơ̆r apinh hăm Kuô̆k hô̆i, Khul kơ dră tĕh đak hơ nơ̆ng đei lơ trong jang vă tưk tơ iung dơ̆ng rim tơ drong ‘lơ̆ng, hơ met pơ ‘lơ̆ng dôm tơ drong mơ mat tat, tơ hlăk tăk hrei ‘nâu nhen tơ drong răt pơ gang, tơ mam pơ yoa ăn jang pơ gang, tơ mât jên ăn anih jang pơ gang tơ̆ tơ ring, hơ met ming jên khei, tơ drong jang atŏk mŭk drăm đơ̆ng choh jang xa…

Thủ tướng Phạm Minh Chính tơ ƀâp bơ ngai tăh hla tơ̆ plt Cần Thơ

Đơ̆ng rŏng mơ̆ng nơ̆r pơ ma, apinh đơ̆ng bơ ngai tăh hla, Thủ tướng Phạm Minh Chính ră roi ăn bơ ngai tăh hla 1,2 tơ drong găh mŭk drăm, tơ pôl 9 khei blŭng sơ năm, atŭm hăm ‘nŏh pơ ma tơ ƀôh dôm tơ drong tam mă ‘lơ̆ng, tam mă pran...Thủ tướng athei rim anih jang kơ pal, tơ ring tơ rang hơ nơ̆ng bơ̆ jang hrơ̆ch ‘lơ̆ng, đei yoa dôm tơ drong jang, trong jang đei tơ lĕch lơ̆m rim tơ drong; lơ̆m nŏh năng kăl truh tơ drong tang găn jĭ COVID-19, vei kơ jăp anih tĕch mơ dro, kơ jă dôm tơ mam kăl pơ ‘nhŏ ăn tơ drong jang xa, arih xa, mă loi ‘nŏh ƀât lêh, têt păng ƀât blŭng sơ năm 2023; tơ gĕch iŏk tơ drong ‘lơ̆ng tơ̆ anih tĕch mơ dro tĕh đak đe ƀât hơ tuch sơ năm.

VOV/Dơ̆ng tơ blơ̆