Bơngai tăh hla hơpơi ‘mĕh păng đei nơ̆r pơma hăm Kuô̆k hô̆i, Khul kơ dră tĕh đak hơnơ̆ng đei lơ trong jang vă tưk tơ iung dôm tơ drong ‘lơ̆ng, hơmet dôm tơdrong mơmat tat, tơhlăk tăk hrei ‘nâu nhen tơdrong răt pơ gang, tơmam pơ yoa ăn jang pơgang, tơ mât jên ăn anih jang pơgang tơ̆ tơ ring.

Thủ tướng Phạm Minh Chính roi tơbăt ăn bơngai tăh hla 1,2 tơdrong găh tơdrong jang mŭk drăm, tơ pôl 10 khei sơ năm 2022, rim tơdrong lơ̆m tĕh đak păng tơ̆ tĕh đak đe hrei ‘nâu, hơ dai hăm ‘nŏh tơroi truh 1,2 tơdrong jang, trong vă jang tơm lơ̆m dôm khei hơ tuch sơ năm 2022.

Kiơ̆ kơ ‘nŏh, Thủ tướng athei rim anih jang kơpal, tơring tơrang ưh gơ̆h lăng pơ hơi lơ̆m tơdrong chĕp kơ̆l pơgơ̆r, hơnơ̆ng kơchăng, bơ̆ jang gơ̆h hơgei, iŏk yoa ‘lơ̆ng dôm tơdrong tơ gŭm vă jang tŏk ming hrĕnh, jang tŏk pran kơjăp. Pơ ‘nhŏ hơdrol ăn tơdrong vei sơ đơ̆ng mŭk drăm lơ̆m tĕh đak, tang găn kơjă tơmam tŏk, pơm ‘lơ̆ng ăn dôm tơdrong jang mŭk drăm tih – năng ‘nâu jĭ tơdrong jang tơm, gĭt kăl hrei ‘nâu.