VOV4.Bahnar - Pơ gê 7/3 Thủ tướng Phạm Minh Chính tơ ƀâp drŏ kăn pơm kơ dră chĕp kơ̆l, vei lăng, bơ ngai hŏk jrŭ păng bơ ngai hơ ri hơ xoang rơ gei ƀlep ƀât Năr apŭng plenh tĕh kơ đe drŏ kăn 08/3. Tơ̆ jơ tơ ƀâp, Thủ tướng Phạm Minh Chính tang măt ăn kơ dră chĕp kơ̆l Đảng, tĕh đak pơ truh nơ̆r ‘lơ̆ng hơ iă hlŏh ăn đe drŏ kăn pơm kơ dră chĕp kơ̆l, vei lăng, bơ ngai hŏk jrŭ păng bơ ngai hơ ri hơ xoang rơ gei, drŏ kăn lơ̆m tĕh đak ƀlep ƀât Năr apŭng plenh tĕh kơ đe drŏ kăn 08/3.

Thủ tướng oei pơ truh nơ̆r bơ nê gĭt kăl ăn đe drŏ kăn pơm ƀak si, jang pơ gang păng đe mŏ ŏh bơ̆ jang tơ̆ anih tang găn jĭ Covid - 19; kŭm hăm lơ mŏ ŏh bơ̆ jang găh lơ tơ drong, hŏk pơ hrăm pha ra băl. Thủ tướng pơ ma hơ dăh, athei hơ nơ̆ng pơm hơ tŏk tơ drong ‘lơ̆ng mưh bơ̆ jang đơ̆ng rim khul drŏ kăn lơ̆m chăl hrei ‘nâu, tơ gŭm ăn drŏ kăn jang tŏk mŭk drăm, pơm hơ tŏk đon hlôh vao, vang jang roi lơ lơ̆m tơ drong jang chinh trĭ, tơ pôl, vă đe mŏ ŏh tơ gop lơ hlŏh dơ̆ng, đei yoa hlŏh dơ̆ng lơ̆m tơ drong jang tơ plih ‘nao, mât jang hơ doi păng jang tŏk kơ tĕh đak.

Dơ̆ng: Tơ blơ̆