VOV4.Bahnar - Tơ̆ jơ tơ ƀâp hăm Kơ dră Jơ nŭm chĕp kơ̆l LHQ Abdulla Shahid, đei anih jang tơ̆ New York, Mi, Thủ tướng Phạm Minh Chính tơ chĕng ‘lơ̆ng dôm tơ drong tơ gŭm hơ drol đơ̆ng Jơ nŭm chĕp kơ̆l LHQ jăl 76 lơ̆m tơ drong jang atŏk tơ iung pran kơ jăp, jang tơ iung ming dơ̆ng đơ̆ng rŏng kơ jĭ, tơ jră hăm tŏ ‘mi kial tơ plih, hơ met ming LHQ.

Thủ tướng Phạm Minh Chính tơ ƀâp Kơ dră Jơ nŭm chĕp kơ̆l LHQ

Thủ tướng Phạm Minh Chính akhan, jĭ tĕh đak tơ ter đak dơ sĭ, Việt Nam tôch năng kăl tơ drong vei sơ đơ̆ng tơ̆ đak dơ sĭ, lơ̆m nŏh đei vei lăng, iŏk yoa đak dơ sĭ, tơ mam drăm lơ̆m đak dơ sĭ kơ jăp ‘lơ̆ng, pơm ‘lơ̆ng ăn tơ drong rơ ngei, sơ đơ̆ng păng hơ tŏk tơ drong pơm kiơ̆ luơ̆t apŭng plenh tĕh, mă loi jĭ nơ̆r pơ kăp Luơ̆t đak dơ sĭ 1982 (UNCLOS); Hơ pơi ‘mĕh Kơ dră Jơ nŭm chĕp kơ̆l tơ rĕk, tưk tơ iung tơ drong ‘nâu mă lăp yoa ‘nâu jĭ tơ drong atŭm, tôch tơ găl đơ̆ng dôm tĕh đak LHQ.

Pơ ma nuh găh dôm tơ drong lơ̆m apŭng plenh tĕh păng tơ̆ tơ ring đei tơ rĕk truh, 2 păh pơ ma truh tơ drong pơm hơ tŏk trong jang lơ pang păng jang hơ doi lơ̆m apŭng plenh tĕh vă tơ jră ‘lơ̆ng hăm dôm tơ drong nol lơ̆m plei tĕh, mă loi ‘nŏh hăm jĭ hơ buh păng tŏ ‘mi kial tơ plih.

Dơ̆ng: Tơ blơ̆