VOV4.Bahnar - Kơ sơ̆ ‘năr 15/3/2022, tơ̆ Anih jang kơ Khul kơ dră tĕh đak, Thủ tướng Phạm Minh Chính hlôi tơ ƀâp, pơ ma nuh hăm ƀok Julius Maada Bio, Kơ dră tơm tĕh đak Sierra Leone. Thủ tướng tơ chĕng ‘lơ̆ng dôm hơ yak tŏk pran lơ̆m tơ drong pơ vei đơ̆ng 2 tĕh đak. 2 păh oei đei lơ tơ drong ‘lơ̆ng vă pơm hơ tŏk hlŏh dơ̆ng tơ drong đei yoa đơ̆ng jang hơ doi, mă loi găh tĕch mơ dro, tơ mât jên jang, choh jang xa, jang kơ măy, pơ tho pơ hrăm, vei sơ đơ̆ng tĕh đak…

Thủ tướng Phạm Minh Chính tơ ƀâp Kơ dră tơm tĕh đak Siera Leone

Thủ tướng athei dôm anih tơm, anih jang kơ pal, anih tĕch mơ dro 2 păh jang hơ doi mă kơ jăp, tơ lĕch jang đei yoa ‘lơ̆ng dôm tơ drong drơ̆ng nơ̆r jang hơ doi găh dôm tơ drong jang đei lơ tơ drong ‘lơ̆ng vă pơih xă truh dôm tơ drong jang nai dơ̆ng. Thủ tướng Phạm Minh Chính păng Kơ dră tơm Julius Maada Bio lui, tơ drong pơ vei ‘lơ̆ng păng jang hơ doi đơ̆ng Việt Nam păng Siera Leone gô tŏk hơ nơ̆ng yoa tơ drong đei yoa kơ kon pơ lei 2 tĕh đak, yoa tơ drong rơ ngei păng jang tŏk tơ̆ tơ ring păng lơ̆m apŭng plenh tĕh.

Dơ̆ng: Tơ blơ̆