VOV4.Bahnar - Kơ sơ̆ ‘năr 17/6, Thủ tướng Phạm Minh Chính pơ gơ̆r tơ ƀơ̆p muh măt kơ Khŭl chĕp kơ̆l pơ gơ̆r teh đak hăm kơ dră chĕp kơ̆l dôm anih jang chih hla ar kơ tơ̆ng ang ƀlep ƀơ̆t tơ băt 97 sơ năm Năr Hla ar chih kơ tơ̆ng ang Việt Nam (21/6). Đơ̆ng rŏng răp mơ̆ng nơ̆r tơ gop đơ̆ng kơ dră chĕp kơ̆l dôm anih jang chih hla ar kơ tơ̆ng ang, pơ ma tơ̆ jơ tơ ƀơ̆p muh măt, Thủ tướng Phạm Minh Chính pơ ma hơ dăh: hla ar chih kơ tơ̆ng ang ‘noh jĭ gơng tơ ƀưh vă pơ truh tơ drong kơ tơ̆ng ang truh hăm kon pơ lei găh tơ drong mŭk drăm - tơ pôl kơ teh đak, tơ roi tơ drong lơ̆m tơ pôl, dôm tơ drong ‘lơ̆ng, chă ƀôh dôm tơ drong sa pơ jĭp, ưh kơ ‘lơ̆ng, brăh brư, dôm trong jang tơ gŭm ưh kơ ‘lơ̆ng kăl kơ hơ met ming.

Jơ tơ ƀơ̆p muh măt

Thủ tướng pơ ma hơ dăh, dôm tơ drong kơ tơ̆ng ang ‘noh tôch kơ ‘lơ̆ng hăm tơ drong vei lăng đơ̆ng Khŭl kơ dră teh đak, Khŭl kơ dră teh đak ling lang răp hơ len, răp mơ̆ng tơ pôl kiơ̆ kênh hla ar chih kơ tơ̆ng ang vă đei trong hơ met pơ ‘lơ̆ng mă lăp, tơ tom. Tang măt Khŭl kơ dră teh đak, Thủ tướng hmach chơt hơ iă, pôk pơ ư păng bơ nê tơ drong vang tơ gop đơ̆ng khŭl chih hla ar kơ tơ̆ng ang teh đak, tơ gop kŭm hăm Đảng, teh đak iŏk đei lơ jơ nei gĭt kăl.

Thuem: Tơ blơ̆