VOV4. Bahnar - Lăp đơ̆ng rŏng Pơm lêh tơbăt ‘măng mă 45 sơnăm Vang iung jang tơblơ̆ hut chăl pơlôch rŭng Pol Pot đơ̆ng Thủ tướng Hun Sen, Thủ tướng Phạm Minh Chính hlôi đei tơ ƀơ̆p păng pơma dơnŭh hăm Thủ tướng Hun Sen tơ̆ Hnam tơgoăt tơgoăl Campuchia - Việt Nam găh apŭng Memot, dêh char Tbong Khmum kơ Campuchia. Thủ tướng Hun Sen hmach chơt hơ iă păng bơnê kơ Thủ tướng Phạm Minh Chính hlôi drơ̆ng nơ̆r vang năm Pơm lêh tơbăt tơdrong pơgơ̆r git kăl năr 20/6/2022, lăng ‘nau tơƀô̆h hơdăh tơdrong ‘lơ̆ng hơ iă ăn tơgoăt tơgoăl joăt joe ƀar păh ƀar hơdrĕch hơdrung Việt Nam – Campuchia. Ƀar Thủ tướng drơ̆ng mĭnh nơ̆r pơtrŭt kơtang ăn khŭl kơdră tơ ƀơ̆p pơma dơnŭh dĭh băl păng tơlĕch jang ‘lơ̆ng rim tơdrong jang “Sơnăm Tơgoăt tơgoăl Việt Nam - Campuchia 2022”, lơ̆m au đei Pơm lêh tơbăt 55 sơnăm năr pơjing tơbôl ƀar păh tĕh đak năr 24/6/2022 tơ̆ Hơnĭh tơm Hà Nội. Ƀar păh jei drơ̆ng mĭnh nơ̆r atŏk kơtang tơgoăt ƀar tơring jang mŭk drăm; hrôih jang keh đang “Trong pơ prŏ jang Tơgoăt ƀar tơring jang mŭk drăm Việt Nam-Campuchia trŭh sơnăm 2030”.

Tơblơ̆ nơ̆r: Amazưt