Tơ̆ jơ tơƀơ̆p, Thủ tướng Phạm Minh Chính pơma hơdăh Việt Nam lăng kăl tơdrong pơvei tơbôl păng jang hơdai lơ tơdrong hăm Costa Rica. Thủ tướng Phạm Minh Chính athei 2 teh đak hơnơ̆ng hơtŏk lui ngeh chĭnh trĭ ‘moi kiơ̆ pơma dơnuh đơ̆ng khŭl rim kơdră, mă loi ‘noh kơdră kơpal, pơma tơgŭm chĭnh trĭ; pơih să jang hơdai mŭk drăm, pơtrŭt tĕch mơdro 2 pang, pơgơ̆r joh ayŏ păng tơgoăt kon pơlei.

2 Kơdră chĕp kơ̆l drơ̆ng nơ̆r athei dôm anih tơm, anih jang kơpal kơ 2 păh jang hơdai tơchă dôm  trong năm ‘nao, dôm trong jang vă pơtrŭt jang hơdai tĕch mơdro, tơmơ̆t jên jang 2 pang kiơ̆ lơ̆m tơdrong đei ‘lơ̆ng păng ‘meh vă đơ̆ng 2 păh. Lăng ‘lơ̆ng dôm tơmam jang hơdai đơ̆ng Việt Nam păng Costa Rica lơ̆m rim tơdrong jang: choh jang sa, tơmang lăng, pơm tơlĕch tơmam yua, kơmăy kơmŏk phần mềm, tơplih kơsô̆, 2 kơdră chĕp kơ̆l drơ̆ng nơ̆r 2 teh đak kăl kơ hơtŏk loi dơ̆ng jang hơdai lơ̆m rim tơdrong jang ‘nâu.