Tơ̆ jơ tơƀơ̆p, 2 kơdră chĕp kơ̆l lăp đon lăng ƀôh tơdrong pơvei jang hơdai Việt Nam – Philippines hơtŏk tơiung ‘lơ̆ng hơiă mă đơ̆ng tơƀơ̆p lơ mơ mat tat yua đơ̆ng jĭ Covid-19; mă loi ‘noh lăng ‘lơ̆ng tơdrong 2 păh pơvei đei yua dôm tơdrong jang tơ ƀơ̆p, pơma dơnuh kơdră kơ pal. Pơma dơnuh mơ dro sa 2 păh hơtŏk tơ iung kơtang, akŏp jên tĕch mơdro sơnăm  2021 iŏk đei 6,8 ti USD, lơ hloh đơ̆ng sơ̆ truh dang ei; lơ̆m 8 khei blŭng sơnăm ‘nâu, kơsô̆ âu iŏk đei vă jê̆ 5,4 ti USD. 

Thủ tướng Phạm Minh Chính athei 2 păh jang hơdai hơmet ‘lơ̆ng hloh ăn ‘măng năm ngôi tơ̆ Philippines vă jê̆ truh đơ̆ng Kơdră Kuôk hô̆i Vương Đình Huệ. Thủ tướng Phạm Minh Chính athei 2 teh đak hơtŏk loi dơ̆ng pơma dơnuh mơ dro sa, lơ̆m noh đei tĕch mơ dro phe; set hơ len hơ met pơ ‘lơ̆ng dôm tơdrong pơgăn ưh kơ kăl, pơm hơnih tĕch mơdro păng tơmơ̆t jên jang hiôk ‘lơ̆ng ăn anih jang mơdro sa đơ̆ng băl, pơtrŭt mơdro sa tơmam đơ̆ng choh jang sa, mă loi ‘noh dôm tơmam đei kơjă tŏk lơ. Thủ tướng athei Philippines hơnơ̆ng bơngơ̆t truh, pơm tơdrong hiôk ăn tơ pôl bơngai Việt jang sa, arih sa tơ̆ Philippines.