Tơ̆ jơ tơƀơ̆p, Thủ tướng Teh đak Phạm Minh Chính tơbăt, lơ̆m ‘măng năm tơmang ou, ƀar teh đak gô drơ̆ng mĭnh nơ̆r pơm hơtŏk loi dơ̆ng tơgoăt tơgoăl dih băl tŏk kơtang hloh dơ̆ng; hrei ou, Kuwait tŏk bŏk tơmơ̆t jên jang tơ̆ Hnam kmăi hlŏng rơgoh đak dou Nghi Sơn hăm kon jên 9 ti dolar păng pơkăp tĕch ăn đak dou tim pơm rơgoh đunh sơnăm ăn Hnam kmăi. Hnam kmăi ou đei iung jang đơ̆ng vă đĭ sơnăm 2018 jĭ mĭnh lơ̆m dôm tơdrong vă jang đei teh đak đe tơmơ̆t jên jang lơ hloh tơ̆ Việt Nam, rim sơnăm pơm tơlĕch tĕch mơdro lơ̆m teh đak đei dang 5 - 7 triu tân đak xăng đak dou, tơgop kơtang lơ̆m pơm sơđơ̆ng đak xăng đak dou ăn Việt Nam, pơtruh ăn lơ tơmam drăm ăn lơ hơnih jang pơm tơlĕch tơmam drăm lơ̆m teh đak. Đei ƀơm truh bơ̆ jang lăng tông kon pơlei Việt Nam oei tơ̆ teh đak đe, Thủ tướng hơpơi ‘meh vă kon pơlei ling lang pran jăng grăng akou, hơnŭk hơnoa, tơgoăt pôm nơ̆r ƀơ̆r đon, tơklep kơjăp, tơgum djru dih băl, ling lang lăng tông nông gia tơ̆ pơlei pơla, teh đak.