Kon pơlei Việt nam tơ̆ Hà Lan đei hlŏh 25.000 ‘nu bơngai tŏk bŏk hŏk pơhrăm, erĭh sa, bơ̆ jang, oei sa ‘lơ̆ng, erih sa sơđơ̆ng păng đei kơdră tơring hôn bơnê. Thủ tướng hôn bơnê dôm tơdrong jang iŏk đei jơnei kơ kon pơlei Việt Nam tơ̆ Hà Lan - mĭnh khŭl kon pơlei lơ tơ̆ châu Âu.

Kon pơlei tơgoăt dĭh băl mĭnh ƀơ̆r đon; jing gơng tơrŏh klŏh klĕch dĭh băl gĭt kăl, tơgŭm tơƀô̆h tơbăt păng hơnhăk tơmam drăm Việt Nam tĕch mơdro tơ̆ Hà Lan păng rim teh đak châu Âu anai. Chơt hơ iă kơ yuơ kon pơlei hlôi pơjing đei Khul bơngai Việt tơ̆ Hà Lan, Thủ tướng hơpơi ‘mĕh vă pơjing dơ̆ng rim khul anai nhen Khul bơngai mơdro sa, khoa hŏk, chă tơchĕng hơlen ... lơ̆m kon pơlei Việt Nam tơ̆ Hà Lan. Tơroi tơbăt ăn kon pơlei găh khei ‘năr vei lăng, tơ iung pơjing, atŏk tơ iung teh đak, Thủ tướng tơbăt, hrei au jang sa iŏk đei jô̆ hơtŏ măt bơngai kơ Việt nam hlôi iŏk đei vă jê̆ 4.000 dolar păng GDP lơ̆m teh đak iŏk đei 400 ti dolar. Teh đak bơ̆n tim lăh đei tơdrong sơđơ̆ng dơ̆ng kơ jăp, hơnih dơ̆ng păng tơdrong lui yom lơ̆m apŭng plĕnh teh nhen hrei au.