Chơt hơiă đei tơƀơ̆p kon pơlei đơ̆ng teh đak bơ̆n lơ̆m ‘măng năm ngôi, bơ̆jang tơ̆ Liên Bang Nga, Thủ tướng tơbăt mă đơ̆ng đĭ truh tơ̆ teh đak Nga lơ ‘măng bơih, mă lei mưh rim ‘măng đei tơƀơ̆p păng pơma dơnuh hăm kon pơlei tă kơ ƀrơ̆k jơhngơ̆m tơ̆ hơnăp “tơdrong ‘mêm hơdrĕch hơdrŭng - ‘mêm băl đơ̆ng kon pơlei” đơ̆ng tơpôl kon pơlei tơ̆ Nga - mĭnh tơpôl pôm nơ̆r ƀơ̆r đon, hơdrin chu pơmat, jơnei păng đei jơhngơ̆m đon băt hue lăng găh pơlei pơla, teh đak.

Thủ tướng ‘meh vă tơpôl bơngai Việt Nam tơ̆ Nga roi ‘năr roi mĭnh jơhngơ̆m đon, sơđơ̆ng, đei anih dơ̆ng kơjăp lơ̆m tơpôl; jing gơng tơƀưh tơgoăt kơjăp ăn tơdrong pơvei 2 teh đak; ‘meh tơpôl hơnơ̆ng pơm kiơ̆ ‘lơ̆ng khôi luơ̆t teh đak kơdih oei sa, hŏk pơhrăm, bơ̆jang pơnam, tơgĕch hŏk pơhrăm tơdrong hlôh vao, tơdrong gơh jang, kơmăy kơmŏk, tơdrong hlôh vao vei lăng đơ̆ng teh đak buăl, hơtŏk loi dơ̆ng tơgoăt hơdai, pơtrŭt tơmơ̆t jên jang, đei lơ tơdrong jang hơdăh ‘lơ̆ng hloh dơ̆ng lăng truh Teh đak. Thủ tướng athei Anih jang tang măt ăn Việt Nam tơ̆ Nga jang ‘lơ̆ng hloh dơ̆ng tơdrong jang vei lăng tơgŭm kon pơlei, vei lăng ăn kon pơlei đơ̆ng teh đak bơ̆n oei hơtăih kơ pơlei pơla.