Tơ̆ lêh tơlĕch, Thủ tướng Phạm Minh Chính pơma hơdăh, oei arih sơ̆, Ƀok Hô hơnơ̆ng ‘mêm mơnat, tơgŭm, pơngơ̆t ăn tơdrong arih xa kơ kon pơlei păng bơngai jang hăm ƀĕnh jơhngâm ‘mêm kơ eng. Tơdrong pơngơ̆t đơ̆ng Ƀok đei rim jơhnơr kơdră chĕp kơ̆l Đảng, tĕh đak chĕp vei, pơtho tơƀôh păng tơ lĕch lơ hla ar chih tơdrong tơgŭm vă atŏk tơiung khul bơngai jang.

Tơ̆ hơnăp kơnh, Thủ tướng athei hơnơ̆ng răp mơ̆ng, roi tơƀôh păng adrin sek tơlang dôm tơdrong pơmat tat, tơhlăk tăk, vei lăng ‘lơ̆ng tơdrong đei yoa trŏ luơ̆t, tôch tơgăl ăn công nhân, bơngai jang. Thủ tướng pơma hơdăh lơ tơdrong jang hăm dôm anih tơm, anih jang kơpal, tơring tơrang păng Tổng Liên đoàn Lao động Việt Nam, lơ̆m nŏh đei, athei vei kơjăp tơdrong jang, pơm hơtŏk tơdrong arih xa, hơmet pơ ‘lơ̆ng anih jang ăn công nhân; akŏm jơhngâm bơ̆ jang đei yoa tơdrong tơgŭm asong tŏk iŏk jên lơ̆m kơsô̆ jên 120.000 ti vă atŏk tơiung hnam oei lơ̆m tơpôl, hnam oei ăn công nhân. Atŭm hăm ‘nŏh, Thủ tướng athei jăh đei trong jang kăl vă pơm hơtŏk tơdrong đei yoa đơ̆ng bơ̆ jang lơ̆m tĕh đak, hơtŏk đon rơgei, bơ̆ jang gơ̆h ăn bơngai jang.