Thủ tướng pơma hơdăh, kŭm hăm trong jang hơdoi oei tŏk tôch pran lơ̆m lơ tơdrong, jang hơdoi găh khul linh đơ̆ng Việt Nam hăm dôm tĕh đak lơ̆m apŭng plenh tĕh hơnơ̆ng đei Đảng, tĕh đak Việt Nam tơrĕk truh, vei kơjăp păng tưk tơiung hlŏh dơ̆ng.

Hăm tơdrong tơm khŏm hơtŏk tơdrong jang hơdoi hăm apŭng plenh tĕh, hơtŏk tơdrong pơma nuh găh khul linh, hơtŏk đon lui đơ̆ng Việt Nam păng dôm tĕh đak lơ̆m apŭng plenh tĕh, hơtŏk tơdrong jang hơdoi găh kơmăy kơmŏk khul linh, ‘Măng pơdă tơmam khul linh apŭng plenh tĕh Việt Nam 2022 ‘nŏh jĭ tơdrong ‘lơ̆ng vă dôm bơngai tơlĕch trong jang găh khul linh, anih jang găh khul linh, vei sơđơ̆ng tĕh đak tơƀâp, pơma nuh, atŏk tơiung, jang hơdoi năm truh 1 apŭng plenh tĕh rơngei, jang hơdoi păng jang tŏk pơdrŏng hơnŭk hơnoa.

‘Măng pơdă tơmam khul linh apŭng plenh tĕh Việt Nam sơng đei hlŏh 170 công ty, anih jang găh khul linh đơ̆ng 30 tĕh đak lơ̆m apŭng plenh tĕh păng dôm anih tơm, anih jang kơpal kơ Việt Nam kŭm hăm hlŏh 250 khul đơ̆ng tĕh đak đe păng lơ̆m tĕh đak vang akŏm, ming pơdă lơ tơmam khul linh. Tơdrong ‘nŏh tơƀôh hơdăh đon tơrĕk păng jơhngâm đon gĭt kăl đơ̆ng dôm tĕh đak, anih jang ‘măn ăn Việt Nam păng khul linh Việt Nam.