Tơ̆ hop akŏm, Thủ tướng athei anih jang tơbôl hơnơ̆ng hơtŏk hơnăp jang năm hơdrol, tơplih ming đon tơchĕng, trong jang mưh bơ̆ jang tơbôl lơ̆m rim tơdrong; pơjing naih jang tơbôl pran kơjăp tôm tơdrong, gơ̆h hơgei đei ƀĕnh tơdrong juăt ‘lơ̆ng đơ̆ng jang tơbôl Việt Nam – pran kơtang găh trong jang, rơdu ‘lơ̆ng mưh bơ̆ jang, ‘lơ̆ng hơiă, pơma xa gơ̆h, vei kơjăp tơdrong đei yoa ăn teh đak- hơdrĕch hơdrung, lăp hăm Tơdrong tơchơ̆t Liên hợp quốc păng Luơ̆t apŭng plenh teh.

Thủ tướng lui păng hơpơi ‘mĕh hăm tơdrong juăt ‘lơ̆ng lơ̆m 80 sơnăm âu ki, anih jang Tơbôl vă hơnơ̆ng tưk tơiung hơnăp jang năm hơdrol, mât 1 ƀơ̆r đon, gơ̆h hơgei, jang đei lơ tơdrong jơnei tih ƀiơ̆, tơgop kŭm hăm teh đak yak mât lơ̆m chăl ‘nao – chăl jang tŏk pơdrŏng, hơnŭk hơnoa, gơ̆h hơgei, hiôk chơt, yak tŏk kiơ̆ trong chủ nghĩa xã hội.