Tơ̆ hop akŏm 2 Thủ tướng chơt hơ iă lăng ƀôh tơ drong ‘lơ̆ng păng tơ drong hơ mĕng mưh tơ mât jên jang, tĕch mơ dro hơ doi. Truh dang ei, jên tơ mât jang đei kĭ pơ kăp tơ̆ Campuchia hlŏh 2,93 ti USD. Campuchia hơ nơ̆ng vei kơ jăp anih dơ̆ng mă 2 lơ̆m 78 tĕh đak đei anih tĕch mơ dro kơ Việt Nam tơ mât jên jang. Việt Nam kŭm hơ nơ̆ng dơ̆ng hơ drol kơ ASEAN păng lơ̆m grŭp 5 tĕh đak tơ mât jên jang lơ hlŏh tơ̆ Campuchia.

Pơ ma tơ̆ hop akŏm, Thủ tướng Phạm Minh Chính akhan anih tơ mât jên jang, tĕch mơ dro tơ̆ Campuchia roi đunh roi ‘lơ̆ng hơ iă kiơ̆ đơ̆ng tơ lĕch Luơ̆t tơ mât jên jang ‘nao păng Luơ̆t Tơ ring jang mŭk drăm gĭt kăl. Thủ tướng oei pôk pơ ư hăm nơ̆r athei đơ̆ng dôm bơ ngai tơ mât jên jang, anih tĕch mơ dro Việt Nam păng Campuchia găh akŏm ăn khul bơ ngai jang, hơ tŏk hrĕnh rim tơ drong tơ mât jên jang, bơ̆ jang trŏ khei ‘năr hơ găt, kơ jăp ‘lơ̆ng; pơm kiơ̆ ‘lơ̆ng khôi luơ̆t đơ̆ng 2 tĕh đak; atŭm hăm ‘nŏh hơ tŏk hơ năp jang hăm tơ pôl, chă tơ drong jang păng hơ nhăk iŏk yoa sơ đơ̆ng, vei lăng cham char păng jang ‘lơ̆ng dôm tơ drong tơ gŭm vei sơ đơ̆ng tơ drong arih xa tơ pôl, tơ gop ăn tơ drong jang tŏk, hơ nŭk hơ noa kơ 2 tĕh đak.