‘Nâu jĭ dôm tơ drong jang mă blŭng lơ̆m dôm dôm hop akŏm tih kơ ASEAN ‘măng mă 40, 41 păng dôm hop akŏm đei ƀơm truh. Thủ tướng Phạm Minh Chính kŭm hăm kơ dră chĕp kơ̆l dôm tĕh đak ASEAN hôn bơ nê tơ drong pơ gơ̆r dôm jơ pơ ma nuh, răp mơ̆ng nơ̆r tơ gop đơ̆ng dôm khul grŭp pha ra băl. Dôm tĕh đak pơ ma hơ dăh tơ drong yak hơ doi đơ̆ng AIPA kŭm hăm Khul kơ dră dôm tĕh đak ASEAN lơ̆m dôm jĭt sơ năm âu ki vang tơ gop gĭt kăl lơ̆m tơ drong pơ jing Tơ pôl ASEAN.

Dôm tĕh đak athei đei lơ trong jang vă pơm hơ tŏk tơ drong đei yoa mưh jang hơ doi đơ̆ng anih jang kiơ̆ luơ̆t păng anih chih pơ jing luơ̆t, lơ̆m nŏh adrin hơ len năng, plĕh hŭt lê̆ dôm tơ drong oei găn trong, adrin jang ‘lơ̆ng kiơ̆ luơ̆t, pơ jing tơ drong hiôk hian vă jang kiơ̆ dôm tơ drong drơ̆ng nơ̆r, tơ drong jang hơ doi, lơ̆m dôm tơ drong jang đei tơ rĕk hrei ‘nâu nhen tơ plih kơ măy sô̆, tơ plih unh hơ yuh, tơ jră hăm tŏ ‘mi kial tơ plih… Dôm kơ dră chĕp kơ̆l pơ ma hơ dăh druh dăm vang tơ gop gĭt kăl vă tơ guăt ƀơ̆r đon păng tơ jră hăm rim tơ drong nol atŭm tơ̆ tơ ring, vang tơ lĕch đei trong jang ăn ning mônh kơnh kơ Tơ pôl ASEAN.