VOV4.Bahnar - Kơsơ̆ năr 12/10 hlôi đei pơgơ̆r tơ̆ Hop akŏm Joăt joe Drŏ kăn jang Kơdră chĕp pơgơ̆r ASEAN ‘măng mă ƀar hăm vang năm đơ̆ng kơdră chĕp pơgơ̆r rim tĕh đak ASEAN păng tang măt ăn rim bơngai drŏ kăn bơ̆ jang Kơdră chĕp pơgơ̆r, Bơngai drŏ kăn mơdro sa đơ̆ng rim teh đak ASEAN păng tĕh đak jang hơdoi. ‘Nau jing tơdrong pơgơ̆r hơlơ̆k dơ̆ng đơ̆ng rŏng Hop akŏm joăt joe Drŏ kăn jang kơdră chĕp pơgơ̆r ASEAN ‘măng mă blŭng đei pơgơ̆r lơ̆m sơnăm 2020 kơ yuơ Việt Nam, Kơdră chĕp pơgơ̆r ASEAN ƀơ̆t dŏh sơ̆ pơgơ̆r.

Thủ tướng Phạm Minh Chính vang Hop akŏm Joăt joe Drŏ kăn jang kơdră chĕp pơgơ̆r ASEAN ‘măng mă 2

Hop akŏm vă pơjing jơ ‘năr pơma dơnŭh dĭh băl khŭl kơpal găh tơdrong hơtŏ hơnơ̆ng drŏ nglo drŏ kăn păng atŏk kơtang hơnăp jang ăn bơngai drŏ kăn, đơ̆ng nŏh lăng đe drŏ kăn kăl hlŏh lơ̆m rim tơdrong hơdrin jang hơdoi păng tơ iung pơjing Tơpôl ASEAN. Thủ tướng Hunsen, Thủ tướng Phạm Minh Chính atŭm hăm lơ kơdră hôn bơnê dôm tơdrong jơnei đơ̆ng tơchăr, lăng ‘nŏh jing hơyak gĭt kăl hlŏh hăm hơnăp jang kơ đe drŏ kăn lơ̆m atŏk tơ iung mŭk drăm-tơpôl tơring păng pơkăp kơtang kơ ASEAN lơ̆m atŏk kơtang hơtŏ hơnơ̆ng drŏ nglo drŏ kăn. Iung pơma tơ̆ Hop akŏm, Thủ tướng Phạm Minh Chính sơkơ̆t hơdăh hơnăp jang păng tơdrong vang tơgop gĭt kăl kơ rim hơnĭh mơdro sa mă bơngai drŏ kăn chĕp kơ̆l lơ̆m hơmet pơ ‘lơ̆ng păng atŏk tơ iung mŭk drăm Việt Nam păng tơring. Thủ tướng jei pơma hơdăh nơ̆r pơkăp đơ̆ng Việt Nam hăm rim tĕh đak ASEAN vă pơtrŭt kơtang hlŏh dơ̆ng hơtŏ hơnơ̆ng drŏ nglo drŏ kăn păng atŏk kơtang hơnăp jang ăn đe drŏ kăn, tơgop lơ̆m mĭnh khei ‘năr đunh đai tai sơnăm kơ jăp ‘lơ̆ng, tôm tong păng hơdrin kơtang kơ tơring păng lơ̆m apŭng plĕnh tĕh.

VOV/Amazưt tơblơ̆