VOV4.Bahnar - Kơ sơ̆ ‘năr (5-6) tơ̆ pơ lei tơm Hồ Chí Minh, Thủ tướng Teh đak Phạm Minh Chính vang akŏm păng pơ ma pơ gơ̆r ‘măng đĭ đăng pơ ma đam kơ dră kơ pal Hop akŏm Mŭk drăm Việt Nam hăm hơ năn: “Pơ jing mŭk drăm hiôk hian, pơm tơm kơ dih tơ klep hăm mơ̆t jang mŭk drăm jrŭ să lơ̆m tơ drong ‘nao” yua đơ̆ng Anih jang Mŭk drăm Trung ương pơ gơ̆r hăm tơ drong pơ gơ̆r đơ̆ng Bơ ngai jang lơ̆m Anih tơm Chĭnh trĭ, Kơ dră Anih jang Mŭk drăm Trung ương Trần Tuấn Anh.

Đơ̆ng rŏng mơ̆ng dôm nơ̆r tơ gop pơ ma dơ nuh tơ̆ hop akŏm, Thủ tướng teh đak Phạm Minh Chính pơ ma hơ dăh, trong vă jang “ hiôk hian, pơm tơm kơ dih tơ klep hăm mơ̆t jang hơ dai” đei ƀôh đơ̆ng đon tơ chĕng ‘lơ̆ng đơ̆ng Đảng bơ̆n găh tơ klep hơ dai jơ hngơ̆m pran hơ drĕch hơ drŭng hăm jơ hngơ̆m pran chăl hle, jĭ tơ drong tơ mơ̆t yua hơ gei  chủ nghĩa Mác- Lê Nin păng đon tơ chĕng Hồ Chí Minh. Găh hơ năp jang, trong jang tơm, Thủ tướng tơ ƀôh hơ dăh: kăl kơ jing anih rơ ngei, kơ jăp hiôk hian, pơm tơm hơ găt teh, sơ đơ̆ng chĭnh trĭ - tơ pôl, sơ đơ̆ng hơ nih khôi luơ̆t, pơm tơ drong ‘lơ̆ng ăn hơ tŏk tơ iung mŭk drăm hiôk hian, pơm tơm kơ dih tơ klep hăm mơ̆t jang lơ̆m apŭng plĕnh teh jrŭ să.

Thuem: Tơ blơ̆