VOV4.Bahnar - Thủ tướng Phạm Minh Chính ‘năr 6/3 vang Hop akŏm pơ trŭt hơ tŏk tơ iung choh jang sa tơ ring tơ măn Đak krong Cửu Long pơm lăp hăm tŏ ‘mi kial tơ plih tơ̆ dêh char Kiên Giang. Tơ drong jang yua đơ̆ng Anih tơm vei lăng găh Choh jang sa păng Hơ tŏk tơ iung tơ ring tơ rang păng 13 dêh char, pơ lei tơm tơ ring tơ măn đak krong Cửu Long jang hơ dai pơ gơ̆r. Hop akŏm pơ trŭt hơ tŏk tơ iung choh jang kơ jăp tơ ring tơ măm đak krong Cửu Long pơm lăp hăm tŏ ‘mi kial tơ plih ‘noh jĭ tơ drong jang đei tơ drong ‘lơ̆ng gĭt kăl vă pơm hơ dăh, pơ trŭt pran kơ tang hloh dơ̆ng tơ drong tơ lĕch jang kiơ̆ Tơ drong tơ chơ̆t Hop akŏm XIII kơ Đảng păng dôm tơ drong tơ chơ̆t, trong jang tơ gŭm tih đơ̆ng Đảng, Teh đak, Khŭl kơ dră teh đak găh hơ tŏk tơ iung choh jang sa. Kiơ̆ tơ drong hơ găt hơ tŏk tơ iung tơ ring tơ măn đak krong Cửu Long truh sơ năm 2025 đei tŏk GDP choh jang sa iŏk đei hloh 3% 1 sơ năm. Iŏk yua  jô̆ păh lăp kơ̆l bơ ngai tơ ring tơ rang tŏk tŏ sĕt hloh 2 ‘măng pơ têng hăm sơ năm 2018. Pơ ma tơ̆ hop akŏm, Thủ tướng teh đak Phạm Minh Chính tơ ƀôh hơ dăh, anih dơ̆ng, hơ năp jang đơ̆ng tơ ring tơ măn đak krong Cửu Long vei anih dơ̆ng tôch kơ gĭt kăl pơ đĭ hloi găh chĭnh trĭ, mŭk drăm, tơ pôl, vei sơ đơ̆ng teh đak, lơ̆m mơ dro sa hăm dôm teh đak  ASEAN păng tơ ring iĕ đak krong Mê Công. Thủ tướng athei, iŏk jang tơ mam ‘lơ̆ng vă hơ tŏk tơ iung choh jang sa bri brăh đei iŏk yua lơ, tơ ring tơ rang ‘nao, kon pơ lei jang chŭn mir hơ gei; băt hơ dăh kon pơ lei jang chŭn mir ‘noh jĭ tơm, tơ ring tơ rang ‘noh tơ drong hơ iă, choh jang sa ‘noh tưk tơ iung; kơ chăng pơm lăp hăm tŏ ‘mi kial tơ plih, athei tơ klep kơ jăp choh jang sa, kơ măy kơ mŏk, pơ vih pơ văn. Kơ măy kơ mŏk păng pơ vih pơ văn ‘noh athei pơm tơ drong ‘lơ̆ng hơ tŏk tơ iung choh jang sa vă hơ nhăk ăn kơ jă kăp gĭt lơ hloh.

Thuem: Tơ blơ̆