Tơ̆ dôm hop akŏm, dôm Kơ dră chĕp kơ̆l ASEAN păng tĕh đak jang hơ doi chă hơ len năng păng tơ lĕch trong jang pơm hơ tŏk tơ drong pơ vei 2 păh. Dôm tĕh đak jang hơ doi pơ ma hơ dăh năng kăl tơ drong pơ vei hăm ASEAN, pơ kăp kŭm hăm ASEAN hơ nơ̆ng pơ gơ̆r pơ ma nuh, jang hơ doi păng tơ jră đei yoa ‘lơ̆ng dôm tơ drong nol, tơ gop hơ met pơ ‘lơ̆ng rim tơ drong lơ̆m tơ ring, hơ tŏk hơ năp jang kiơ̆ luơ̆t apŭng plenh tĕh, hăm ASEAN iŏk hơ năp jang tơm.

Tơ̆ Hop akŏm tih ASEAN-Trung Quốc ‘măng mă 25, Thủ tướng Trung Quốc pơ ma hơ dăh, ASEAN jĭ grŭp đei rơih vă jang hơ doi tơm đơ̆ng kơ dih, pơ ma dơ̆ng nơ̆r pơ kăp năng kăl hơ năp jang tơm đơ̆ng ASEAN lơ̆m tơ ring, hơ pơi ‘mĕh kŭm hăm ASEAN tơ lĕch jang đei yoa ‘lơ̆ng Tơ drong pơ vei jang hơ doi gĭt kăl tôm tơ drong ‘nao đei pơ jing, hơ nơ̆ng pơ kăp tơ gŭm ăn ASEAN pơ jing Tơ pôl păng tưk tơ iung hơ năp jang lơ̆m dôm khul grŭp tơ̆ tơ ring păng lơ̆m apŭng plenh tĕh.

Pơ tôch hop akŏm, Kơ dră chĕp kơ̆l dôm tĕh đak ASEAN păng Trung Quốc drơ̆ng nơ̆r pơ ma tơ băt 20 sơ năm jang kiơ̆ tơ drong pơ ma xa, bơ̆ jang ‘lơ̆ng hơ iă đơ̆ng dôm pang tơ̆ đak dơ sĭ Biển Đông (DOC), pơ ma dơ̆ng tơ drong gĭt kăl đơ̆ng DOC hăm tơ drong rơ ngei, sơ đơ̆ng ‘lơ̆ng tơ̆ đak dơ sĭ Biển Đông, Tơ lĕch nơ̆r tơ chơ̆t atŭm găh hơ tŏk tơ drong jang tŏk hơ dai păng kơ jăp đunh, Tơ chơ̆t atŭm găh jang hơ doi vang vei sơ đơ̆ng phe ƀa tơ mam xa…