Tơ̆ Hơnĭh tơm Brussels, Teh đak Bỉ, Thủ tướng Phạm Minh Chính vang năm păng iung pơma tơ̆ Hop akŏm khul kơdră kơpal Mơdro sa ASEAN-EU găh ‘ngoăih Hop akŏm Kơdră kơpal Tơbăt ASEAN-EU hăm hơnăn “Atŏk kơtang mơdro sa ASEAN-EU: Atŏk tơ iung kơjăp ‘lơ̆ng ăn rim răih bơngai”.

Iung pơma tơ̆ hop akŏm, Thủ tướng Phạm Minh Chính tơlĕch 5 nơ̆r tơbăt kăl ‘nŏh pơma hơdăh atŏk kơtang tơgoăt tơgoăl apŭng plĕnh teh, lăng kơ jăp trong jang lơ pang, jang hơdoi kơjăp, ‘lơ̆ng hơ iă hlŏh dơ̆ng ƀar păh rim teh đak. Thủ tướng pơma hơdăh, tơgoăt tơgoăl mơdro sa ƀar păh EU păng ASEAN roi năr roi atŏk tơ iung tôm tong kơna rim teh đak kăl pơm pơkeh hlŏh dơ̆ng rim trong tơchơ̆t khôi luơ̆t, pơjing hơyak, jơ rơvơn ‘lơ̆ng hơ iă hlŏh vă rim hơnĭh mơdro sa hơnơ̆ng iung jang pran, tơchăr hơgei, jang tơnăp, tơgoăt kơjăp hlŏh dơ̆ng, jang kiơ̆ dôm tơdrong hlôi iŏk đei jơnei. Thủ tướng sơkơ̆t hơdăh, Việt Nam hrei au iung jang tơbôl kơjăp, lơ trong, tơgoăt tơgoăl lơ pang kơ yuơ rơngei hiôk hian, tơgoăt tơgoăl, jang hơdoi păng atŏk tơ iung.