VOV4.Bahnar - Pơgê năr 21/2 tơ̆ Hà Nội, Thủ tướng Phạm Minh Chính vang năm hop akŏm păng iung pơma tơ̆ Hop akŏm Hơnĭh mơdro sa Việt Nam rim sơnăm hăm hơnăn “Hơmet pơ ‘lơ̆ng păng atŏk tơ iung tĕch răt lơm khei ‘năr hle”.

Iung pơma tơ̆ Hop akŏm, Thủ tướng Phạm Minh Chính pơma hơdăh, sơnăm 2022 ‘nŏh jing sơnăm tôch gĭt kăl hăm Việt Nam, pơjing hơyak pran kơtang iung jang rim trong tơlĕch jang gĭt kăl trŭh sơnăm 2030. Việt Nam tŏk bŏk đei rơvơn atŏk tơ iung kơtang jơhngơ̆m pran tĕh đak, tơdrong lui yom tĕh đak đơ̆ng rŏng 35 sơnăm tơplĭh ‘nao. ‘Nau jei jing khei ‘năr long, tơdrong tơchăr păng tơdrong iung jang ‘lơ̆ng hơ iă kơ pơ đĭ Khŭl kơdră Tĕh đak păng hơnĭh mơdro sa vă atŭm yak hlŏh tơnap tap kiơ̆ jơhngơ̆m đon “vang hơlêm dĭh băl tơnap tap”, “đei iŏk yua hơtŏ, đei tơdrong vang tơgŭm dĭh băl”. Ƀơ̆t măt jang kiơ̆ iok đei jơnei Tơdrong jang hơmet pơ ‘lơ̆ng păng atŏk tơ iung mŭk drăm-tơpôl, tơklep hăm Tơdrong jang tang găn jĭ hơbŭh Covid-19, atŏk kơtang tơdrong jang ƀet vaccine.

Tơblơ̆ nơ̆r: Amazưt