Kơsơ̆ năr 19/12, Dơnŏ anĭh tơm jang Jên hu pơgơ̆r hop akŏm pơtôch bơ̆ jang jên hu-Hơnĭh mong jên Teh đak sơnăm 2022, tơlĕch tơdrong jang sơnăm 2023. Thủ Tướng Phạm Minh Chính vang năm păng iung pơma chĕp pơgơ̆r hop akŏm. Hop akŏm đei pơgơ̆r kơtă atŭm hăm trưk tuyên ƀar păh Hơnĭh tơm jang Jên hu hăm 62 hơnĭh pơdăh kơ rim dêh char, pơlei tơm găh Trung Ương.

Tơ̆ Hop akŏm, Thủ tướng Teh đak pơma hơdăh, sơnăm 2023 ‘nŏh jing sơnăm gĭt kăl hlŏh iung jang kiơ̆ Trong pơprŏ jang atŏk tơ iung mŭk drăm-tơpôl, jên hu 5 sơnăm 2021-2025 păng sơnăm mă 3 jang kiơ̆ Trong jang kăl atŏk tơ iung mŭk drăm-tơpôl 10 sơnăm 2021-2030 kiơ̆ tơdrong tơchơ̆t đơ̆ng Đảng, Kuô̆k hô̆i, tơdrong jang đei tơlĕch ăn hăm hơnih jang Jên hu ‘nŏh tôch trăp trĭn. Thủ tướng drơ̆ng nơ̆r hăm trong jang, trong pơgơ̆r jang kiơ̆ trong pơpro jang jên hu-Hơnih mong jên Teh đak sơnăm 2023; akŏm pơrô̆, iung jang hơdoi kơjăp đơ̆ng blŭng hloi sơnăm 2023, hơdrin jang keh đang rim trong tơlĕch jang atŏk tơ iung mŭk drăm tơpôl păng trong jang Kon jên bơ̆ jang teh đak sơnăm 2023, mă kăl ‘nŏh tang găn kĕ kơ jă tŏk jur, sơđơ̆ng jang mŭk drăm, hơmet ming kon jên jang teh đak, teh đak hre, atŏk tơ iung tơdrong jang jên hu teh đak sơđơ̆ng, kơ jăp.