Xơnăm 2022, Anih Mong jên Teh đak hlôi pơm jang đei jơnei kăp gĭt, lơ̆m noh Anih Mong jên Teh đak tơrĕk hơlen, keh đang trong pơkăp jang găh jên hu păng anih mong jên vei xơđơ̆ng 'lơ̆ng kơjăp; pơgơ̆r jang kiơ̆ pơkăp jên hu hơbĕch hơbal, tơtom păng jang hadoi hăm pơkăp jên hu hlôi tơchơ̆t, dôm trong jang kăp gĭt nai, tơgop hơlen tơdrong huach kư̆ kă păng pơtoi vei xơđơ̆ng tơdrong jang mŭk drăm, pơtrŭt hơtŏk pran hloh.

Anih mong jên pơtoi yuk hơlâu lơ̆m jang kiơ̆ tơplih sô̆, tơgop kăp gĭt lơ̆m hơtŏk kla jên ưh đei yua jên măt pơtoi tŏk pran kơtang, pơm trŏ tơdrong kăl roi năr roi kơjung kơ tơdrong jang mŭk drăm. Tang măt ăn Khul Kơpal teh đak, Thủ tướng xơkơ̆t păng pôk bơnê kơ dôm tơdrong adrin khŏm mă jang đei jơnei kơ Anih Mong jên lơ̆m xơnăm 2022. Thủ tướng ră hơdăh, xơnăm 2023 jing xơnăm kăp gĭt, pơkăl đơ̆ng anih mong jên pơtoi iŏk yua dôm tơdrong đei jơnei, tơdrong kơchăng hơbĕch, tơplih 'nao vă hơmet dôm tơdrong oei tơjruh; adrin pơm jang tơnăp, đei jơnei hloh dôm tơdrong xơnong jang kơpal, xơnong jang đei pơjao; pơtrŭt pran tơplih sô̆ hăm hơtŏk pơ-'lơ̆ng tơdrong jang, vei xơđơ̆ng tơpôl erih jang xa.