VOV4.Bahnar - Gơmăng năr 20/1, tơ̆ Hà Nội, Thủ tướng Phạm Minh Chính vang năm Pơm lêh Pôk ăn tơmam hơpăh Khoa hŏk, Kmăi kmŏk lơ̆m plei tĕh VinFuture (VinFuture Prize) ‘măng mă blŭng. Pơm lêh pôk ăn tơmam hơpăh VinFuture akŏm đei lơ kơdră jang hơgei lơ̆m apŭng plĕnh tĕh păng tơbăt hơdăh trong tơchăr, pơjing đei ƀơm trŭh kơ trĭu ‘nu bơngai gô hơnhăk Việt Nam jing hơnĭh tŏk bŏk kơ khŭl khoa hŏk, pơm ăn tơdrong lăng ba kơ jăp đơ̆ng apŭng plĕnh tĕh hăm Việt Nam. Tơdrong pơgơ̆r au tơgop tơbăt hơdăh Việt Nam jing hơnĭh trŭh ‘nao kơ khoa hok kmăi kmŏk apŭng plenh tĕh, adoi pơjing rơvơn tơgoăt, pơjing tơdrong jang hơdoi kơtă, lơ pang ƀar păh rim bơngai khoa hŏk apŭng plĕnh tĕh păng Việt Nam. Đơ̆ng lơ̆m pơyan pôk hơpăh ‘măng mă blŭng, VinFuture hlôi hơvơn tơdrong lăng ba kơ jăp đơ̆ng khŭl khoa hŏk apŭng plĕnh tĕh hăm hlŏh 1.200 ‘nu chĭh hơnăn đơ̆ng 654 hnam trương đăi hŏk tơm dơnơm, 51 hơnĭh tơm chă tơchĕng hơgei, 42 viện hàn lâm khoa hŏk tĕh đak hơgei lơ̆m apŭng plĕnh tĕh. Tơmam hơpăh hlôi drơ̆ng iŏk 599 trong tơlĕch vă jang pơjei dĭh băl.

Tơblơ̆ nơ̆r: Amazưt