VOV4.Bahnar - Ƀlep ƀơ̆t tơ băt 92 sơ năm năr pơ jing Đảng Cộng sản Việt Nam, chơt hơ iă Đảng, chơt hơ iă pơ yan puih mak, chơt hơ iă Teh đak păng kơ kuh sơng sơ năm ‘nao Nhâm Dần 2022, gơ măng ‘năr 21/1, Anih pơ gơ̆r Trung ương pơ gơ̆r pơm lêh tơ băt hơ dăh păng pơ jao tơ mam hơ păh pơ long chih kơ tơ̆ng ang lơ̆m teh đak găh pơ jing Đảng chĕp hơ năn Búa liềm vàng ‘măng mă 6. Thủ tướng Phạm Minh Chính truh akŏm păng pơ jao pôk hơ păh tơ mam.

Thủ tướng Phạm Minh Chính pơ jao tơ mam pôk hơ păh ăn dôm bơ ngai chih kơ tơ̆ng ang đei iŏk jơ nei

Pơ ma tơ̆ jơ pơm lêh, Kơ dră chĕp kơ̆l Ban Bí Thư Võ Văn Thưởng chih iŏk hơ len lăng ‘lơ̆ng tơ drong vang tơ gop tih tên đơ̆ng hla ar chih kơ tơ̆ng ang lơ̆m teh đak hăm tơ drong jang pơ jing, hơ met ming Đảng khei ‘năr âu ki, pôk pơ ư tơ drong hơ drin đơ̆ng Anih pơ gơ̆r jang, khul pơ gơ̆r pơ long búa liềm vàng ‘măng mă 6 păng hmach chơt hơ iă kơ dôm bơ ngai iŏk đei jơ nei. Kơ dră chĕp kơ̆l Ban Bí thư tơ roi rơ đăh, dôm ƀai chih kơ tơ̆ng ang găh pơ jing Đảng hlôi tơ gop tơ gŭm lơ lap kon pơ lei lơ̆m păng ‘ngoăih teh đak, bôl buăl apŭng plĕnh teh hlôh hơ dăh hloh găh Đảng bơ̆n păng tơ drong jang pơ jing, hơ met ming Đảng găh dôm jơ nei teh đak iŏk đei hăm tơ drong chĕp kơ̆l đơ̆ng Đảng.

Thuem: Tơ blơ̆