VOV4.Bahnar - Gơmăng hei, năr 27/4, Thủ tướng Tĕh đak Phạm Minh Chính vang pơm lêh Tơbăt 30 sơnăm năr pơjing dơ̆ng dêh char Sóc Trăng (khei 4/1992-4/2022) păng sơng iŏk Mê Đai Hồ Chí Minh, Tơbăt hơdăh Pơlei tơm Sóc Trăng jing hơnih kơdrơ̆m kơ loăi II găh lơ̆m dêh char Sóc Trăng.

Iung pơma tơ̆ jơ pơm lêh, Thủ tướng tĕh đak Phạm Minh Chính pơma hơdăh, đơ̆ng rŏng 30 sơnăm tơ iung pơjing păng atŏk tơ iung, Sóc Trăng kăl sơkơ̆t hơdăh dôm tơdrong đei kơ dĭh, rơvơn kăl, kĕ pơjei vă atŏk tơ iung tĕnh koăng, kơ jăp ‘moi kiơ̆ đơ̆ng kơ dih ‘nŏh jing trong tơchơ̆t, trong jang kăl, đunh đai păng tơdrong vang tơgŭm đơ̆ng ‘ngoăih ‘nŏh gĭt kăl hlŏh. Thủ tướng athei, Sóc Trăng kăl hơnơ̆ng vei kơ jăp, hơmet pơ ‘lơ̆ng păng jang kiơ̆ hơnơ̆ng drơ̆ng minh nơ̆r lơ̆m Khŭl Đảng, Khŭl kơdră, atŏk kơtang jơhngơ̆m pran tơgoăt tơgoăl ƀar păh rim hơdrung. Akŏm tơlĕch jang kiơ̆ jơnei rim Tơdrong tơchơ̆t kơ Kuô̆k hô̆i, Khŭl kơdră tĕh đak găh tang găn jĭ hơbŭh Covid-19 păng hơmet pơ ‘lơ̆ng, atŏk tơ iung mŭk drăm-tơpôl; jang keh đang hrôih tơdrong ƀet hơlơ̆k dơ̆ng vaccine mă 3 ăn dôm bơngai đơ̆ng 18 sơnăm năm tơ̆ ‘lŏ kră, ăn hơ iŏh đơ̆ng 5 sơnăm trŭh vă jê̆ 12 sơnăm lơ̆m jăl  II/2022.

Tơblơ̆ nơ̆r: Amazưt